مع انى بقالى كتير مليش نفس اكتب مش عارف ليه حتى اخر حاجه حاتطها على البلوج كانت قديمه اصلا كنت كاتبها من زمان بس الصراحه مقدرش اكسف الكبير بتاعنا هدى جمال وخصوصا ان دى اول مره يعدى عليا تاج فانا بشكرها جداا
من هو احب شخص لقلبك فى الدنيا؟
ابويا وامى واختى هو فى ناس بتقول ان كون ان احنا عيله من اربع افراد بس ده بيخلينا مترابطين اوى مش عارف يمكن بس احنا فعلا بنحب بعض اوى عيله رومانسيه على رأى خالد صاحبى وبحب قرايبى كلهم وبحب اشوفهم كتير صعايده بقا هنعمل ايه هى دى طبيعتنا وطبعا اصحابى الحمد لله رب العالمين انا ليا اصحاب كتير جدااااااااا لدرجة انى لو فكرت فى اى وقت اخرج لازم هلاقى حد اخرج معاه ومش عارف بحبهم على ايه مع انى ساعات بتخنق منهم واخص بالذكر كلهم
انسان مستعد اضحى بحياتى علشانه؟
من غير تفكير اختى طبعا هى اكتر حد فى الدنيا بخاف عليه ويمكن اصحابى المقربين عارفين انى بعيط لما بيجيلها دور حساسيه وبيقعدوا يضحكوا عليا بس انا كده
اسم اول حب؟
مفيش داعى انا سامع واحد خفيف بيقول ايه ده اسمها مفيش وابوها اسمه داعى هههههههه كركركركركر خفيف الاخ عايز يتطخ
اسم اخر حب؟
بصو يا جدعان لو لسه بتفكرو فى الحوارات دى هى مرة اتنيلت وخلصنا خلاص الموضوع خلص
the movie is over
ده للناس الى ضعيفه فى العربى
اسم اجمل كتاب كتبه بشر ومحتفظ بيه لحد دلوقتى؟
مجلد اشعار للرائع فاروق جويده اصل انا العاشق المغرم لجويده
شىء تحس بالراحه النفسيه عندما تنظر اليه؟
البحر والنيل بس بليل عندى استعداد اتفرج عليهم بالساعات والهوا يخبط فيا
مكان تحس فيه بالحنين الى شىء لا تدرى ماهو و ذكريات جارفة الى لاشىء ؟
الصحرا انا بحب الصحرا جدااا متفهموش ليه وانا مسافر مطروح السنه الى فاتت الاوتبيس طلع الساعه 12بليل اول ما مسك الصحراوى روحت رايح للمشرف بتاعنا واديته سندوتش وقعدته مكانى وقعدت انا مكانه جمب السواق الصحراوى رائع بليل وخصوصا طريق العالمين البنى ادم الى بيتريق عليا دلوقتى يحترم نفسه دى اسئله وانا بجاوب عليها اه بحب الصحرا بليل والى يخاف يروح
مكان تحس بالراحة عندما تدخله ؟
المساجد طبعا اكتر مكان فى الدنيا برتاح لما ببقا فيه بيت ربنا وفى حديث عن الرسول عليه الصلاة والسلام كان رواه ابو هريره ان هناك سبعه يظله الله فى ظله يوم لا ظل الا ظله ومن السبعه دول رجل قلبه تعلق بالمساجد اللهم اجعلنا منهم يارب العالمين يجى بعد كده اسيوط لان انا من هناك فبحب اروح هناك جدااا ناس طيبين ومحترمين وانزل البلد الى بحبها جداااااا واسمها ببلاو نسبه الى جدى الكبير الببلاوى
ايون خلى بالك معايا البلد هى الى اتسمت ببلاو نسبة الى الببلاوى مش الببلاوى الى اتسمى كده نسبه الى ببلاو لان انا اسمى عمرو بهى الدين صلاح عبد الحافظ على جاد حيدر منصور احمد على الببلاوى
اجمل مدينة زرتها داخل مصر ؟
مرسى مطروح انا روحتها خمس مرات لحد دلوقتى بعشقها
أجمل مكان طبيعي رأيته داخل مصر؟
عجيبه
اهم جهاز منزلى انت متعلق بيه او بتستخدمه كتير ؟
الكمبيوتر طول منا فى البيت قاعد قدام الكمبيوتر الا وانا باكل او لو فى ماتش ماما بتقعد تقولى يابنى اقعد مع بنى ادمين شويه بقولها منا قاعد بتكلم مع بنى ادمين بس على النت
سرعة بروسيسور جهازك ؟
1.7
حجم ذاكرة –هارد- جهازك ؟
يا جدعان بروسيسور ايه وهارد ايه انا حاسس انى واقف فى سوق العصر 80جيجا ياخونا وعلى فكره لولا ان الهارد ال40باظ وجاله باد سيكتور بهدله مكنتش غيرته لان انا الكمبيوتر بالنسبالى نت وبس
نوع هاتفك المحمول؟
انا مليش فى الموبيلات اوى بس جبت 6630علشان شفته مع مشمش قصدى احمد السيد وعجبنى الصراحه
المساحة التى تشغلها المواد الاسلامية على جهازك؟
مساحه كويسه الحمدلله نقدر نقول الاغلبيه
نفس المساحة السالف ذكرها فى قلبك ؟
ربنا اعلم بيها
أهم هدف انت واضعه لحياتك دلوقتى ؟
لسه على اخر الشهر اقولكم امانه عليكو تدعولى
مواصفات فتاة –أو فتى للبنات- الأحلام بالنسبة لك ؟
فتاة احلامى لازم تكون متدينه وتعرف ربنا وفاهمه دينها كويس اوى لانها لما تبقى كده هتبقى زوجه كويسه معايا وهتبقى ام رائعه لاولادى ولازم تكون ذكيه مش لازم الذكاء الحاد وكل واحد فينا ربنا مديله قدرات عقليه معينه بس انا بقا بكره الى مبيشغلش دماغه يعنى عاوزها تبقى بتشغل دماغها مش لازم تكون عبقريه يعنى
صف ما يأتى :شعورك لما بتسمع كلمة مصر؟
لا بحس بحاجات كتير انا بحب البلد دى اوى او بمعنى ادق منتمى ليها اوى ومصر كبلد انا هفضل احبها ايا كانت الظروف من وانا صغير كنت ببقا مهتم اوى بتحية العلم والنشيد والكلام ده وكنت بحتقر الطالب الى بيقف ميقولش النشيد زى ما حاليا بحتقر اللعيب الى مبيقولش النشيد فى الماتش وكمان انا افتكر قسم كنا بنقوله فى اعدادى فى الطابور كنا بنقول اقسم بالله العظيم ان اكون مخلصا لجمهورية مصر العربيه وان ادافع عنها ضد كل عدو وكل غاصب وكل محتل وان اكون مثلا صالحا فى اخلاقى واعمالى والله على ما اقوله شهيد
شعورك لما بتسمع كلام عن اليهود ؟
بصو انا اقولكو على حاجه هما ليهم سوابق بشعه طبعا من قديم الازل بس انا بحب ابقا محدد يعنى مصر فيها يهود لحد دلوقتى ومبيعملوش حاجه وحشه لحد وفى جميع انحاء العالم فى يهود فانا تقدرو تقولو بكره الصهاينه لان ليس كل يهودى صهيونى ولكن كل صهيونى يهودى
حتى انا لما بحب ادعى بقول اللهم عليك بالصهاينه مش باليهود ودى وجهة نظرى الشخصيه المتواضعه
يلهوى يا هدى انتى مش بتمرريلى تاج ده قصر ملكى ما علينا ماشى ياستى انا مكمل
شعورك لما بتشوف ظابط شرطة ؟
هو مفيش كلام ان سمعتهم بقت صعبه اوى بس انا مبحبش اصدر كلام عن حد الا لما اشوف تصرفاته لان فيهم قله محترمين
شعورك لما بتشوف الكناس العجوز فى الطريق ؟
بيصعب عليا جدااا طبعا بس بقول ربنا كبير
لون البطانية اللى بتتغطى بيها فى الشتاء ؟
اللهم انى لا اسألك رد القضاء ولكنى أسألك اللطف فيه هو مين الى اخترع ألأسئله دى
لون الجورب-الشراب- المفضل لديك ؟
لا الصراحه سؤال قوى جدااا بسم الله الرحمن الرحيم الاجابه ابيض
احساس يراودك فى اشارة مرور مغلقة بسبب مسئول كبير؟
بفتكر قول سبحانه وتعالى انك ميت وانهم ميتون
زغردن يا امهات اعلن الافراح لن نترك السل...........سورى قصدى اقول انى خلصت الاسئله بس الحماسه خدتنى وبمرر التاج لاى حد فاضى ومش لاقى حاجه يعملها لا بس الصراحه فى اسئله كتير جميله ومهمه طبعا وبشكر هدى جمال على تمريرها اول واخ.....لا بهزر طبعا ياريت تتكرر بس بعيد عن الشربات والبطانيات لان دى خصوصيات الحاجات دى بتتنظر
